ROXAS CITY – Nakutkutan sang trabahador sa ginaubra nga poso negro ang isa ka mortar round sa Sitio San Juan, Barangay Baybay, Roxas City.
Sa exclusive interview sang Bombo Radyo Roxas kay Renante Dante Abool, ginpahayag sini nga nagakutkot ini sang ginaubra nga poso negro sang mabatyagan nga may naigo nga metal sa duta nga ginakutkot.
Nagduda ini sa naigo sang iya nga bara rason nga ginhinay hinay lamang sini ang pagkutkot tobtob makita niya ang mortar round.
Gilayon sini nga ginpahibalo sa mga opisyales sang barangay ang nakita nga mortar.
Samtang, suno naman kay punong barangay Reynaldo Magallanes sang Barangay Baybay, Roxas City nga posible nga may iban pa nga mortar nga nalubong sa duta sa nasambit nga barangay bangud nagserbe ini nga watch tower sang mga hapon sadtong World War 11.
Sa karon ginturn over na ni Kapitan Magallanes sa mga katapu sang Firearms and Explosives Security and Guard Supervision (FESAG) sa Capiz Police Provincial Office ang nasambit nga mortar round.
