Nag-angkon sang pilas sa magkatuhay nga parte sang lawas ang 59-anyos nga lalaki sang nagbato ini sa pulis sang gin-serbehan sang Warrant of Arrest sa Brgy. Santa Ana, banwa sang Tapaz sang Nobyembre 16 sang kaagahon.
Ginkilala ang nadakpan kay Rolando Eleuterio Galagate nga residente sang nasambit nga lugar.
Nagapangatubang ini sa mga kaso nga Qualified Rape nga wala sang piyansa, Sexual Abuse kag Lascivious Conduct nga lunsay may ginrekomendar nga piyansa nga tig-P200,000.
Suno kay PLT Lebirato Cagampamg Jr., OIC sang Jamindan Municipal Police Station, una nila nga ginkadtuan sa Brgy. San Jose banwa sang Jamindan si Galagate agud i-serve ang Warrant of Arrest bangud sandig sa ila impormasyon nga nakuha didto nagatinir ang amu nga lalaki.
Apang pag-abot sang kapulisan sa amu nga lugar, wala na didto si Galagate.
Pahayag pa ni Cagampang nga liwat sila nakabaton sang impormasyon nga yara sa Santa Ana, Tapaz si Galagate.
Gilayon nila nga ginpadulungan ang amu nga barangay bangud nagalapitay man lang ini.
Suno kay Cagampang nga sang ginserbehan na sang warrant of arrest si Galagate nagbato ini kag ginpalukpan ang pulis.
Ginapahayag nga maka-duha ka beses nga ginpalukpan ni Galagate ang mga pulis rason nga ginpalukpan man ini sang kapulisan.
Pilas sa tiil, kamot kag kilid ang naagom ni Galagate nga ginabulong sa karon sa Western Visayas Medical Center sa Mandurriao, Iloilo City kag naka-hospital arrest.
