Nagapati ang punong barangay sang Barangay San Julian, Tapaz, Capiz nga posible may kaangtanan sa trabaho sang biktima nga si Demetrio Gargoles Sr., 60-anyos bilang tanod sa barangay ang pagluthang-patay sa iya sang suspek nga si Ryan Gimeno alyas Tata 29-anyos sang nasambit nga lugar.
Ginpahayag ni Kapitan Jomar Fabayos nga wala sang rekord nga nag-away ang duha, apang ba-se sa imbestigasyon nga pila ka adlaw antes ang krimen, nakaangkon sang pagbaisay ang biktima kag suspek matapos nga ginsaway sang tanod si alyas Tata.
Suno sa opisyal nga may lain nga batasan ang suspek nga nagtenir sadto sa squatters area sa Manila nga nadala sini sa Tapaz sa iya nga pagpauli.
Ginlaragway pa ni Kapitan Fabayos nga mahugod nga tanod ang biktima.
Nahibaluan nga nagakatulog si Gargoles Sr., sa iya nga balay sang pwersa nga ginbuksan ni alyas Tata ang pirtahan sang balay kag kasunod sa iya pagsulod ang pagluthang sa biktima.
Ginpahayag nga nakabati sang asud asod nga lupok ang kaingud balay sang biktima sa diin sang padulungan ang balay ila nakita ang biktima nga nagapaligo na sa kaugalingon nga dugo.
Gindala pa ini sa ospital, apang gindeklara nga dead on arrival sang doktor.
Nag-angkon sang duha ka igo sang luthang sa likod ang biktima gamit ang .45 kalibre nga pusil.
Samtang madasig nga nagpalagyo ang suspek matapos makomiter ang krimen kag padayon sa karon nga gina-ayam sang mga kapulisan.
