ROXAS CITY – Ginapatihan nga pagtimalos ang motibo sang mga suspetsado sa pagpatay sa 54-anyos nga mangunguma nga ginpaulanan luthang kag ginhatuk-hatok labo sa Barangay Agpalali, Tapaz, Capiz.
Sa interview sang Bombo Radyo kay Police Senior Master Sergeant Rocer Garde, imbestigador sang Tapaz Municipal Police Station, ginpahayag sini nga hinablos ni Gerry Olog ang ginatudlo suspek sa pagpatay kay Lornalee Gallenero nga si Ariel Olog, 23-anyos sang Barangay Roxas, Tapaz, Capiz.
Mahibaluan nga si Gerry Olog ang una nga nasapwan nga ginpatay kag ginlubong sa Sitio Malansa, Barangay Abangay sang amo man nga banwa sang nagligad nga semana.
Nahibaluan man nga may yara sang warrant of arrest si Ariel bangud sa kaso nga pagpatay sa isa man ka himata ni Gallenero sang tuig-2018.
Ginpatpat ni Garde nga nag-ugat ang pagbinaslanay sang magtimbang nga kampo sang ginbuno-patay sa isa ka bilasyonan sa Barangay Agpalali ang katapo sang pamilya Gallenero sang tinaklidan nga tuig.Bangud diri nagpangabay si Garde sa magtimbang nga pamilya nga itugyan na lamang sa mga otoridad kag sa husgado ang pagsolbar sa krimen agud malikawan na ang pagkadula sang dugang pa nga mga kabuhi.
