Dakop ang isa ka motorista matapos makuhaan sang iligal nga droga kag armas sa ginpatigayon nga check point sang mga kapulisan sa Barangay Poblacion Ilawod, Panitan, Capiz.
Ang nadakpan amo si alyas Archie, 34-anyos kag residente sang Poblacion Ilaya, Panitan, Capiz.
Sa interview sang Bombo Radyo kay Police Captain Ronald Ton-ogan, officer in charge sang Panitan Municipal Police Station, iya ginpahayag nga papuli na kuntani ang subject person halin sa Roxas City padulong sa banwa sang Maayon, Capiz sang ginpapundo kag ginrekisa.
Suno kay Ton-ogan, narecover sa paghinakop sang subject person ang 10 ka sachets sang ginapatihan shabu kag .45 caliber nga armas nga loaded sang bala kag wala sang nagakaigo nga dokumento.
Sa subong, yara na ang subject person sa kustodiya sang Panitan Municipal Police Station kag magapangatubang sang kaso nga paglapas sa Republic Act 10591 ukon Comprehensive Law on Firearms and Ammunition Regulations Act kag Republic Act 9165 ukon Comprehensive Dangerous Drugs Act of 2002.
