Patay na sang nasapwan ang isa ka 29-anyos nga motorista sa Brgy. Cudian, Ivisan, Capiz, subong nga adlaw, Setyembre 27, 2026.
Sa interview sang Bombo Radyo kay PMAJ. Rile Villariez, Officer in Charge sang Ivisan Municipal Police Station, ang biktima amo si alyas Nonoy, isa ka security guard sa Iloilo City kag residente sang Brgy. Jaena Norte, Jamindan.
Nasapwan ang biktima nga nagakulob sa kilid sang dalan, upod ang iya motorsiklo sa may bahin sang highway nga may tubig.
Suno sa initial nga imbestigasyon sang kapulisan, posible nga napiyungan sa katuyuhon ang biktima samtang nagamaneho. May yara man ini sang samad sa ulo sang nasapwan ang biktima nga ginapatihan nga amo ang kabangdanan sang iya kamatayon.
Apang, ginpahayag ni Villariez nga ipa-autopsy sang pamilya ang bangkay agod mahibaluan kon may foul play sa insidente.
Nagpaandam man ang kapulisan sa mga motorista nga maghalong sa pagmaneho, ilabi na kon gab-i na, kag likawan ang pagmaneho kon nakainom.
