Pilason ang 19-anyos nga motorista matapos malapakan sang oil tanker truck sa aksidente nga nagluntad sa Barangay Bato, Panay, Capiz.
Ang biktima amo si alyas “Jam”, kag residente sang Barangay Anhawon, Panay, Capiz.
Samtang ang driver sang oil tanker kay alyas “Nold”, 46-anyos kag residente sang Barangay San Esteban, Pilar, Capiz.
Sa interview sang Bombo Radyo kay Police Captain Jean Alayon, Officer in Charge sang Panay Municipal Police Station, iya ginpahayag nga nagabiyahe ang biktima halin Roxas City kag papuli na kuntani sa Brgy. Anhawon sang iya sini nga motorsiklo.
Pag-abot sa lugar sang insidente, ginaalegar nga nag-overtake ang biktima sa isa ka tricycle samtang nagapaliko naman patuo ang truck nga maga-garahe na.
Bangud sini, bumunggo ang motorsiklo sa oil tanker truck kag pumaidalum biktima kag nalapakan sang kariton ang tuo sini nga butkon.
Gilayon naman ini nga gindala sapinakamalapit nga ospital ang biktima para hatagan sang nagakaigo nga pagbulong.
Sa subong, yara kustodiya sang Panay Municipal Police Station ang driver sang truck para sa nagakaigo nga disposisyon samtang nagapadayon ang imbestigasyon.
