CAPIZ- Apektado gid ang mga jeepney operators kag drivers sa padayon nga pagtaas sang presyo sang gatong, nga nagtuga sang dugang nga palas-anon indi lang sa sektor sang transportasyon kundi pati man sa mga mangunguma.
Sa interview sang Bombo Radyo kay Joebert Carandang, Chairman sang Pinagkaisang Samahan ng mga Tsuper at Operator Nationwide (PISTON) -Capiz, iya ginpahayag nga dako gid ang epekto sang price hike sa ila pangabuy-anan kag nagapadugang sang problema sa ila nga income.
Dugang pa sini, may promise suno sa iya halin sa gobyerno nga magahatag sang fuel subsidy nga may alokasyon nga P2.5 milyon, pero may duda ini kon madayon ini ukon indi bangud sang mga tensyon sa Israel kag Iran nga nagapasaka sang presyo sang gatong. Nagapanawagan siya nga ipanagtag na ang subsidiya agud mabuligan ang mga apektado nga sektor.
Samtang, ginapanawagan sang organisasyon nga kinahanglanon nga ibasura ang Oil Deregulation Law, nga suno sa iya, wala sang pulos kag wala naga-benefit ang sektor sang transportasyon.
Bisan pa nga wala sila naga-hingyo sang fare increase, ginpanugyan ni Carandang nga siguraduhon nga puno ang mga jeep sa tagsa ka pasada agud malikawan ang pagkalugi. Suno sa iya, bisan wala sang dagdag nga pasahe, importante nga mag-mangin epektibo ang operasyon agud magpadayon ang pangabuy-anan sang mga drivers.
Panugyan naman sini nga kun sa tion maaprubahan ang ginaduso sang iban nga organisayson may kaangtanan sa dugang pamasahe, kuntani hangpon ini sang tagsa-tagsa bangud sa nagapadayon man nga pagtaas sang presyo sang gatong.
Interviewed by Bombo Francis Biñas
