ROXAS CITY – Ginpadangat sa Mambusao District Hospital ang nakabunggo nga driver sang Suzuki FW110d, matapos ang nagluntad nga aksidente sa Barangay Bilao, Sapian, Capiz.
Ginkilala ang driver sang nakabunggo nga motorsiklo kay Rajen Lee Amistoso, 19-anyos, wala sang driver’s license kag mga backriders sini nga sanday Edilberto Gucor kag Ian Orap-orap, lunsay 20-anyos kag mga residente sang Crossing Talaba, Brgy. Maninang, sa amu nga banwa.
Sandig sa inisyal nga imbestigasyon sang mga katapo sang Sapian MPS, samtang ginasubay sang Yamaha Mio nga motorsiklo nga ginamaneho ni Anthony Delos Santos, 37-anyos, taga Poblacion Proper, Mambusao, sakay ang backrider nga si Eunalyn Delos Santos, 34-anyos kag residente sang Brgy. Bilao, Sapian, Capiz, hinali nalang nga bumunggo sa ila nalikod nga porsyon ang nagasunod nga motorsiklo nga ginamaneho ni Amistoso.
Bangud diri, nag-angkon sang kapilasan sa lawas ang nakabunggo nga driver, nga gilayon gindala sa nasambit nga ospital.
Nagpamalibad naman ang mga biktima nga sakay sang Mio nga ipadangat sa ospital apisar nag-angkon sang menor nga kapilasan sa lawas.
Ginaalegar nga yara sa impluwensya sang makahulubog nga ilimnon ang nakabunggo nga driver.
Ginkustodiya ang magtimbang nga motorsiklo sa Sapian MPS.
