Gintaban sang wala pa makilan-an nga persona ang isa ka motorsiklo sa isa ka apartment sa Kilometer 1, Roxas City.
Ginkilala ang tag-iya kay Lerry John Barbecho Villance, 22-anyos kag residente sang Brgy. Mahunod-hunod, Cuartero, Capiz.
Sandig interview sang Bombo Radyo kay Lerry John, ginpahayag nga ginbilin sini ang iya motorsiklo sa ginaparkingan sini sa ila apartment. Nakita pa ini suno diri sang iya nga barkada nga naka-park pa sa takna alas-11:00 sang gab-i, Setyembre 26.
Dugang pa sini, sang tion nga nagbalik na ang iya nga barkada sa ila nga apartment sa takna alas-6:00 sang aga, gintawag sini si Lerry John kag didto ginpahibalo nga wala na sa ginaparkingan sini ang iya nga motorsiklo.
Bangud sini, natalupangdan sang mga ini nga posible nga ginkawat ang iya motorsiklo.
Mahibaluan nga nagaduag sang blue ang nasambit nga motorsiklo nga may plate number nga 974FRM.
Sa karun, ginpabalhag na sa Roxas City Police Station, ang nasambit nga insidente samtang, nagapanawagan naman ang tag-iya nga kun may mabaligyaan ukon may makakita sang iya nga motorsiklo, palihog nga ipahibalo sa iya ukon sa mga kapulisan.
