Nabalik na sa tag-iya ang motorsiklo nga ginmotornap sang nagligad nga Marso 31, 2021 sa Barangay 10, sining syudad.
Yara karon sa kostodiya sang Highway Patrol Group ang ginatudlo suspek nga si Gerald Besana sang Barangay Pawa, Panay, Capiz matapos nakita sa iya posesyon ang Bajaj nga motorsiklo nga ginapanag-iyahan ni Norwel Nepomuceno sang Barangay 10, sining syudad.
Nahibaluan nga nag-upod ang biktima nga si Nepomuceno sa ginpatigayon nga clean-up drive sa Sitio Cambuyayao, Barangay Pawa, Panay, Capiz sa diin sang matapos na sila sa nasambit nga aktibidad, nagtan-ay si Besana kay Nepomuceno nga sa ila na lamang balay magpanghugas sang kamot.
Sang yara na sila sa balay sang suspek, natalupangdan ni Nepomuceno ang isa ka motorsiklo nga kasubong familiar sa iya.
Nakumpirma lamang sini nga ini ang nadula nga motorsiklo sang gintsekyar sini ang chasis number.
Kasunod sini ang pagpangayo sang bulig sa mga pulis kag Highway Patrol Group nga nagresponde kag gindakup si Besana.
