Padayon ang backtracking kag pagtipon sang mga ebidensya sang Roxas Component City Police Station may kaangtanan sa pagluthang-patay sa isa ka delivery rider sa Sitio Ilaya, Brgy. Sibaguan, Roxas City.
Ang biktima ang ginkilala kay alyas Chester, 22 anyos, kag residente sang Brgy. Dinginan, Roxas City.
Sa interview sang Bombo Radyo kay Police Lieutenant Colonel Rogelio Tomagtang Jr., hepe sang Roxas Component City Police Station, iya ginpahayag nga base sa inisyal nga imbestigasyon, makapila ka beses nga nagbalik-balik sa lugar ang suspek ukon mga suspek antes ginluthang ang biktima.
Suno pa kay Tomagtang, nakarekober sang mga imbestigador sang lima ka basiyo sang bala sa lugar sang insidente.
Dugang pa sini, wala sang may nadula sa mga personal nga kagamitan sang biktima.
Sa subong, padayon pa ang imbestigasyon sang mga kapulisan agud matumod ang motibo kag makilala ang responsable sa pagluthang patay sa biktima.
