Ginaduso sang Department of Environment and Natural Resources–Provincial Environment and Natural Resources Office (DENR-PENRO) Capiz nga i-deklara ang Mount Panginraon sa banwa sang Dumalag nga protected area bangud sa importansya sang bukid sa supply sang tubig sang banwa, may manggaranon nga biodiversity, kag proteksyon batuk sa kalamidad.
Sa interview sang Bombo Radyo kay DENR-Capiz Provincial Environment and Natural Resources Officer Dr. Ernest Federiso, iya ginpahayag nga ang Mount Panginraon nagasakop sang 440.22 ektarya kag nagaserbe bilang critical watershed nga naga-supply sang tubig sa pila ka mga creeks kag springs sa Dumalag.
Suno kay Federiso, kun maabusar ang lugar ukon magguba ang kagulangan, posible nga madula ang mayor nga source sang banwa sang matinlo nga tubig.
Pahayag niya, ang pag-proteher sang bukid ang makabulig man sa pagbuhin sang risgo sa tion sang kalamidad.
Ang Mount Panginraon may yara sang mataas nga geohazard risk, kag masobra 70.5 percent sang kabug-osan nga area ang gin-classify bilang delikado sa landslides.
Gani ang pag-preserba sang kagulangan suno kay Federiso ang makabulig nga mahagan-hagan ang risgo sang landslides kag ma-improve ang resilience sang komunidad sa climate-related hazards.
Nahibaluan nga sang damlag lang, nagpatigayon sang public consultation kag public hearing ang Conservation and Development Section (CDS) sang DENR-PENRO Capiz sa banwa sang Dumalag may kaangtanan sa ginaduso nga pag-establisar sang Mount Panginraon Protected Landscape sa idalom sang National Integrated Protected Areas System (NIPAS).
