ROXAS CITY – Ginpalawig ang movement control order (MCO) sa Malaysia tobtob sa Mayo 18, 2020 para matapna ang coronavirus disease 2019 (COVID-19) sa nasambit nga pungsod.
Sa report ni Bombo International Correspondent Jeobert Edem sang Sitio Sta.Ana, Barangay Binuntucan, Pontevedra, Capiz, nagatrabaho bilang casino dealer sa Resorts World Genting, Malaysia, ginpahayag sini nga hugot nga ginapatuman sang Malaysian government ang preventive measures agud indi na magtaas pa ang numero sang mga nagkalamatay sa nasambit nga virus
Kalakip sa istrikto nga ginapatuman sa pungsod ang stay-at-home policy, paggamit sang face mask kun magguwa sa balay kag social distancing.
Madamo man ang nadulaan sang trabaho bangud sa lockdown sa Malaysia apang may iban nga kompaniya nga padayon nga ginaswelduhan ang ila mga empleyado apisar nga temporaryo nga nauntat ang ila nga operasyon.
Suspendido man ang tanan nga public transport sa Malaysia.
Apang suno kay Edem nga wala sang curfew sa pungsod bangud nagasunod ang mga tawo sa gobyerno sa kahadluk nga malatnan sang COVID-19.
Ginmandu man sang tagdumalahan sang ginatrabahuan ni Edem sa ila nga mga empleyado nga magpabilin lamang sa sulod kag likawan ang pagguwa agud indi malatnan.
Posible man nga liwat ma-extend ang lockdown sa pungsod kun indi malab-ot ang zero case sa Malaysia.
Samtang nagapakig-angut man ang Ministry of Health sang Malaysia sa iban nga pungsod para sa mga testing kits nga ginagamit sa massive testing para mahibaluan kun infected sang coronavirus disease 2019 ang isa ka tawo.
