Nagakabatyag na sang kakulba si Mr. Regional Association of State Universities and Colleges ukon RASUC VI 2026 Paul Castor Janobas para i-represent ang Western Visayas sa Philippine Association of State Universities and Colleges ukon PASUC sa Abril.
Si Jonabas ang nagtiglawas sang West Visayas State Universiy sa Mr. RASUC VI 2026 kag nakuha ang titulo.
Sa interview sang Bombo Radyo kay Janobas, iya ginpahayag nga memorable ang paghiwat sang RASUC bangud magluwas sa kalipay nga nakuha niya ang titulo, nakakita pa siya sang mga abyan nga amo ang mga kaupod man niya sa pageant.
Gintuad naman sang Mr. RASUC VI 2026 2nd Runner Up nga si John Lloyd Diosaban sang Capiz State University nga nakabatyag ini sang pressure sang gin-represent ang buluthuan.
Nagapati ini nga nahatagan man niya sang dungog ang CAPSU kag fulfilling ini nga naka-eksperyensya nga maka-compete sa iban nga mga eskwelahan sa Western Visayas.
Ginakabig naman ni Jay Cañete sang Iloilo Science and Technology University nga life changing ang pag-intra sini sa pageant kag nagalaum nga naka-inspire siya sa mga estudyante nga maghimakas kag magpadayon.
Dako man ang nabulig sang pageant sa pag-build sang iya kumpyansa kag paghatag sang balor sa iya kaugalingon.
Ginpakigbahin naman ni Jared Demonteverde sang Iloilo State University of Fisheries Science and Technology ang pinaka-importante nga leksyon nga iya nakuha sa pag-intra sa pageant.
Na-reyalisar niya nga indi lang isa ka kompetisyon ang iya nga ginpasakopan sa baylo isa ka journey nga nagtudlo sa iya nga ang personal development wala nagakatabo samtang yara sa stage ukon sa spotlight, sa baylo nagakatabo sa mga preparasyon, sa pag-practice kag sa adlaw-adlaw nga pagpanikasog.
