Magapatuman sang installment basis ang Metro Roxas Water District (MRWD) sa pagbayad sang bill agud mabuligan ang mga konsumidor nga may daku nga balanse ukon mataas nga balayran sa tubig.
Sa interview sang Bombo Radyo Roxas kay Mark Vincent Bernas, spokesperson sang MRWD, iya ginpahayag nga mahimo maka-avail ang mga konsumidor nga may balanse pa nga nabilin, mataas nga konsumo sang tubig kag madugay na nga nadiskonekta nga luyag magpa-reconnect sang ila suplay sang tubig.
Suno kay Bernas, kinahanglan magbayad ang konsumidor sang 50% sang ila kabug-usan nga balanse bilang downpayment, samtang ang nabilin nga kantidad mahimo bayaran paagi sa installment.
Gin-athang naman natungdan nga wala nagbag-o ang disconnection policy sang ahensya mahimo sa gihapon nga madiskonect ang suplay sang tubig kon wala mabayaran ang bill sa sulod sang isa ka bulan kag lima ka adlaw pagkatapos sang due date.
