Gin-anunsyo sang Department of Agriculture (DA) sini nga Huwebes nga panubuan sini ang maximum suggested retail price (MSRP) para sa 5 porsyento nga broken imported rice sa Hulyo 1 agud mas mapanubo pa gid ang retail price sang bugas.
Ulihi nga ginpanubo ang MSRP para sa bugas sang Marso 31 matapos ang serye sang amat-amat nga pagnubo nga nagsugod sa P58/kilo sadtong Enero.
Suno kay DA Secretary Francisco Tiu Laurel Jr., ila panubuan ang MSRP sa P43/kilo para sa 5 porsyento nga broken rice gikan sa karon nga P45/kilo.
Suno sa iya, ang lihok ang makapanubo pa gid sang retail prices sang bugas sa lokal nga merkado kag nagapangibabaw nga presyo sang iban pa nga sahi sang bugas.
Gin-anunsyo man ni Tiu Laurel ang ila plano apisar nga ang rice inflation ang narekord sa -12.8 porsyento sadtong Mayo, mas mahinay sang sa -10.9 porsyento sang Abril suno sa Philippine Statistics Authority (PSA).
Tubtob Hunyo 4, P45/kilo ang nagapangibabaw nga presyo sang imported premium kag well-milled rice sa Metro Manila, kag P40.5/kilo para sa imported regular-milled rice.
Samtang nagalab-ot naman sa P43 tubtob P50 ang presyo sang premium imported rice; imported well-milled rice, P38 tubtub P48; kag imported nga regular milled rice, halin sa P35 tubtub P45.
Ang presyo sang kada kilo sang premium local rice nagalab-ot sa P44 tubtob P60; lokal nga well-milled rice, P38 tubtob P52; kag lokal nga regular-milled rice, P30 tubtub PHP45; nga may nagapangibabaw nga presyo nga P50, P45, kag P40.
