Nagalaum si Agriculture Secretary Francisco Tiu Laurel Jr. nga mas manubo sa ₱50 ang mangin buhin sa presyo sa kada kilo sang imported rice sa una nga parte sang Marso.
Nauna diri, gin-anunsyo ni Laurel nga iganubuan subong nga Miyerkules, February 5, ang maximum suggested retail price sang imported nga bugas sa ₱55 kada kilo para sa 5% nga pagkadunot ukon broken nagikan sa anay presyo nga ₱58 per kilo.
Ini agud mapamag-an ang ginapas-an sang mga manugbakal sa mataas nga presyo sang nagapanguna nga pagkaon sa pungsod.
Kabahin ini sang pagpanginuha sang Department of Agriculture (DA) nga mapapag-on ang presyo sang bugas kag mapamag-an ang pressure sa pagtaas sang mga nagapanguna nga balaklon.
Ang desisyon ang resulta sang lapnagon nga konsultasyon sa mga stakeholder sang industriya sang bugas, kalakip na ang importers kag retailers, agud masiguro nga mapuslan sang mga manugbakal nga indi naapektuhan ang supply sang bugas.
Bilang dugang sa pagbuhin sa presyo sang imported nga bugas, magapadayon ang DA sa hugot nga pag-monitor sa supply sang bugas sa mga merkado pati na man ang kondisyon sang mga ini.
Ginsiguro sang DA nga makasiguro ang publiko sang bastante nga supply sang bugas kag presyo samtang ginasuportahan ang pangmadugay nga seguridad sa pagkaon kag ang pagsanyog sang lokal nga industriya sang bugas.
