ROXAS CITY – Nagreklamo sa pulisya ang isa ka katapo sang Municipal Social Welfare and Development Office (MSWDO) sang banwa sang Ivisan matapos ang ginpakita nga indi maayo nga aktwasyon sang isa ka pulis samtang sila ang nagapatigayon sang validation kag releasing sang Social Amelioration Program (SAP).
Suno sa tagreklamo nga si Mira Docallos, nagalain gid ang iya nga buot bangud sa ginhimo sang wala na sini ginhingadlan nga pulis sang sila ang yara sa barangay hall sang Barangay Poblacion Norte, sang nasambit nga banwa.
Ginpahayag sini nga wala nila mahatagan sang ayuda ang utod sang amo nga pulis bangud kinahanglan pa ini nga ma-validate matapos mahibaluan nga may negosyo ini nga isa ka bakery.
Apang diri kag nagsal-ot ang nasambit nga pulis suno kay Docallos kag ginkwestiyon sila sa ila nga ginhimo.
Suno kay Docallos nga matawhay sini nga ginpaathag sa amo nga pulis ang guidelines apang sa iya kakibot, nagtaas na ang tingog sang amo nga pulis kag nagbuhi sang indi maayo nga mga tinaga.
Ginpahayag ni Docallos nga nahuy-an gid ini bangud may mga nakasaksi pa sa nangin aktwasyon sang nasambit nga pulis.
Bangud diri, ginpakamaayo na lamang ni Docallos nga ipabalhag sa pulisya ang natabo.
Gilayon man suno diri nagpangayo sang pasaylo sa iya ang nasambit nga pulis rason nga indi na magpasaka pa sang panumbungon si Docallos.
Apang nagpangabay lamang si Docallos nga kuntani indi na masulit pa ang kasubong sini nga insidente.
