ROXAS CITY – Ginsabat sang Municipal Social Welfare and Development OfficeR sa banwa sang Panay ang alegasyon sang isa ka lalaki nga may ‘’multiple disability’’ nga nakabaton sang P6,000 nga Social Amelioration Program (SAP) sang gobyerno, apang gilayon man nga ginbawi.
Ginpahayag ni Syvil Billanes nga wala nakabaton sang amo nga kantidad si Jovanie Candelario sang Sitio Talaba, Barangay Pawa, Panay, Capiz, bangud indi ini kwalipikado sa programa.
Makapamatood man suno kay Billanes ang ila ginauyatan nga dokumento kasubong sang payroll nga ginapirmahan sang mga benepisyaryo nga nakabaton sang ila ayuda gikan sa gobyerno sa diin wala sang pirma si Candelario, kabaliktaran sa ginapakigbato sini.
Ginpanindugan pa sang opisyal nga indi mahimo nga makapa-picture si Candelario bangud sang nagfill up ini sang form para sa social amelioration card, natukiban nga wala ini sang pamilya kag naga-estar sa gihapon sa balay sang ginikanan sa Barangay Pawa.
Ginpahangup man ni Billanes nga klaro sa pagsulundan nga target sang programa ang pamilya nga mahatagan sang bulig kag wala nabutang sa memorandum circular nga mahimo man nga mahatagan sang bulig ang isa lamang ka indibidwal.
Ginkatingala man sini kun ano ang motibo ni Candelario nga ginapamilit sini nga napicturan ini kag nakabaton sang SAP, apang ginbawi lamang bangud madamo ang makapamatood nga wala sang kasubong sini nga insedente nga natabo.
Ginapanindugan pa ni Billanes nga maidid nila nga ginatsekyar ang ginapirmahan nga dokumento kag ginasiguro nga kwalipikado ang yara sa listahan kag matood nga benepisyaryo sang SAP.
