Nagpaguwa sang 6,367 tonelada nga volcanic sulfur dioxide ang bulkan nga kanlaon kun sa diin ini na ang ikatatlo nga pinakamataas nga SO2 emission sa tuig 2024, suno sa Philippine Institute of Volcanology and Seismology (PHIVOLCS).
Naibalita ang SO2 fumes sa pila ka barangay sa Murcia, Negros Occidental.
Nagtuga man ang Kanlaon sang 700-meter steam-rich plumes nga tuga sang mabaskog nga degassing activity gikan sa summit crater.
Nakapagrekord man ang PHIVOLCS sang average nga siyam nga volcanic earthquakes kada adlaw humalin paglupok, kag mahinay apang padayon nga inflation kag pressurization sang edifice humalin sadtong Marso 2022.
Nasa idalom sang Alert Level 2 ang Kanlaon kun sa diin buot silingon nga mataas ang posibilidad sang paglupok ukon makatalagam nga magmatic eruptions halin sa summit crater.
Ginlaygayan naman ang publiko nga maglikaw sa four-kilometer Permanent Danger Zone (PDZ) kag magpabilin nga mapagmatyag sa posible nga risgo nga dala sang bulkan.
