Liwat nga nagbuga sang mataas nga lebel sang Sulfur Dioxide ang bulkang Taal.
Base sa ginpaguha nga report sang Philippine Institute of Volcanology and Seismology ukon PHIVOLCS, nagadangat sa 11,745 tons sang sulfur dioxide ang ginbuga sang nasambit nga bulkan.
Mas mataas ini ikumparar sa 7,777 tonelada sang volcanic sulfur dioxide nga ginabuga sang Taal sa sini nga tuig.
Bangud diri, nagtuga sang madakmol nga aso nga nagsaka pa sa 2,400 metro ang taas sa may bahin sang Taal crater ukon sa baba sang bulkan.
Ginapahalong man sang Philvocs ang publiko bangud posible suno diri nga makaapekto sa ikaayong lawas sang tawo ang mataas nga konsentrasyon sang sulfur dioxide.
Partikular nga maka-apekto ini sa mata, tulun-an kag mangin sa respiratory tract sang isa ka indibidwal.
Ginganyat man sini ang mga pumuluyo sa lugar nga magpabilin sa sulod sang ila sini nga puluy-an kag magsuksok sang N95 facemask kag iban pa nga tikang agud indi makaangkon sang balatian.
Sa karon, yara gihapon sa alert level 1 ang bulkang Taal nga kun sa diin, nagapabilin pa ang mga banta sang paglupok sini.
