Malapit na nga mahuman ang ginapatukod nga Multi-Purpose Building sa Barangay Liong, Roxas City, isa sa mga proyekto sang Provincial Government sang Capiz sa idalom sang liderato ni Governor Fredenil H. Castro.
Gintuyo ang proyekto nga mangin bag-o nga venue para sa mga aktibidad, programa kag mga pagtililipon sang komunidad.
Paagi sa sini nga pasilidad, mangin mas hapos para sa mga pumuluyo kag barangay nga ipatigayon ang mga meeting, community assembly, programa para sa kabataan kag senior citizens, kag iban pa nga aktibidad sang komunidad.
Ginalauman man nga ang building mangin lugar para sa mga programa nga makapalig-on sang pagbinuligay kag paghiliusa sang mga pumuluyo sa Barangay Liong.
Ang proyekto ginpondohan paagi sa Local Government Support Fund–Financial Assistance to Local Government Units o LGSF-FALGU, nga nagasuporta sa pagpauswag sang mga pasilidad kag imprastruktura sa mga pumuluyo.
Kabahin ini sang pagtinguha sang Provincial Government of Capiz nga makahatag sang mas maayo nga mga pasilidad nga magaserbisyo kag makabenepisyo sa mga pumuluyo sa malawig nga tion.
