Natapos na ang konstruksyon sang multi-purpose hall sa Brgy. Tico, banwa sang Panay nga magaserbe para sa nagkalain-lain nga aktibidad kag serbisyo sang komunidad.
Sa interview sang Bombo Radyo kay Punong Barangay Anthony Villaraiz, sang Brgy. Tico, Panay Capiz, iya ginpahayag nga ang nasambit nga multi-purspose hall isa ka importante nga pasilidad nga magahatag sang lugar sa nagkalain-lain nga aktibidad kag serbisyo sang barangay.
Suno kay Villaraiz, ginpatigayon ang proyekto sang isa ka construction company kag nagsugod sang Agosto 5, 2025 antes natapos sang Disyembre 22, 2025.
Nahibaluan nga P7 million ang kabug-usan nga budget sang proyekto kag ginpatuman sa idalom sang Department of Public Works and Highways.
Dugang pa niya, dako nga bulig ang multi-purpose hall sa barangay assemblies, evacuation sa tion sang kalamidad, sports activities kag iban pa nga programa para sa benepisyo sang mga residente.
Nagpanawagan man sang natungdan nga padayon nga amligan kag gamiton sang husto sang mga pumuluyo ang bag-o nga multi-purpose hall agud magdugay ini kag padayon nga makaserbisyo sa masunod pa nga mga tuig para sa bilog nga barangay.
