Nagpasaka sang Multiple Counts of Perjury sanday anay Cuartero, Capiz Mayor Tito Mayo kag incumbent Sangguniang Bayan Member Eileen Palmes batuk sa anay empleyado sang Capiz Provincial Government nga si Fernando Garcia, Jr.
Ini matapos nga gin-akusahan ni Garcia sanday Mayo kag Palmes sa iya gin-file nga Complaint-Affidavit sa Roxas City Prosecutors Office sang Disyembre 2025.
Si Garcia amo man ang una nga nagpasaka sang reklamo sa Ombudsman batuk kay Capiz Governor Oto Castro, Vice Governor Jaime Magbanua kag iban pa nga mga opisyal sang provincial government may kaangtanan sa pagkuha sang madamo nga legal consultants.
Ginpahayag sanday Mayo kag Palmes nga ginapanginwala nila ang mga alegasyon ni Garcia batuk sa ila, kag ginsiling nga ang iya mga pahayag sa nasambit nga affidavit amo ang basehan sang ginpasaka nila nga kaso nga perjury.
Ang perjury amo ang paghatag sang indi matuod nga pahayag sa idalom sang panumpa, kag ang kaso nga ginpasaka nanday Mayo kag Palmes batuk kay Garcia yara pa sa proseso sang pag-usisa sang mga otoridad.
