ROXAS CITY-Hugot nga ginpanginwala sang Municipal Administrator sang banwa sang Sapian nga bukbokon ang bugas nga ila nga ginpanagtag sa mga kabarangayan sa nasambit nga banwa.
Ini ang ginsabat ni Sapian Municipal Administrator Mr. Kenneth Honrado kasunod sang reklamo nga ginpalab-ut sa Bombo Radyo sang isa ka residente sang Barangay Lonoy sang nasambit nga banwa nga bukbokon ang bugas nga ginpanghatag sa ila sang LGU.
Ginpahayag ni Honrado nga indi bukbokon kag good rice ang ginpanagtag nga bugas sang LGU sa mga kabarangayan.//
Suno pa sa kay Honrado nga ikalima na ini nga batch sang ila pagpanagtag sang nasambit nga bugas apang wala man sang may nagreklamo sa ila nga residente.
Dako ang pagpati sini nga isa lamang ini ka sahi sang pagpamanad sa administrasyon ni Mayor Arthur Ike Biñas kag sa lokal nga gobyerno sang nasambit nga banwa.
Suno kay Honrado nga posible ginbutang gid lamang ang bukbok sa bugas agud may yara sang ireklamo sa Bombo Radyo.
Samtang ginhangkat naman sini ang nagareklamo nga magpadulong sa iya talatapan kag magpresentar sang ebidensya.
Matandaan nga isa ka concerned citizen sang Barangay Lonoy sang nasambit nga banwa ang nagpalab-ut sang reklamo sa Bombo Radyo matapos nga nakabaton ini sang bugas nga bukbokon gikan sa LGU.
