ROXAS CITY-Natalana nga pagaimbestigaran sang Municipal Engineering Office sang banwa sang Pontevedra ang masami nga pagbaha sa pabahay sang National Housing Authority (NHA) sa Barangay Rizal, Pontevedra Capiz.
Sa interview sang Bombo Radyo sa kay Engr. Zaldy Bebit, Municipal Engineer sang banwa sang Pontevedra, ginpahayag sini nga nakapatigayon sang declogging operation ang ila nga talatapan sa mga barado nga drainage sang nasambit lugar.
Aminado ini nga madamo sang basura nga nakit-an sa sulod sang mga drainge system nga posible gintunaan sang pagbinaha-baha sang tion sang pagpanalasa sang Bagyong Quinta.
Apang plano sang talatapan nga imbestigaran kun ano pa gid ang ginatunaan sang pagbaha sa lugar.
Suno pa sang kay Bebit nga wala pa naturn-over sa lokal nga gobyerno sang nasambit nha banwa ang phase 2 sang nasambit nga pabahay bangud luyag sang LGU nga mapasiguro nga wala sang mga problema antes batunon gikan sa NHA.
Matandaan nga nagdangop sa Bombo Radyo ang pila ka mga residente sang Pabahay matapos nga ginbaha ang ila nga lugar sang tion sang kasagsagan sang Bagyong Quinta.
Samtang ginatudlo naman sang National Housing Authority (NHA) ang ang mga basura sang mga residente nga ginatunaan sang masami pagbinaha-baha sa amo nga lugar.
