ROXAS CITY-Nagpaathag ang Municipal Health Officer sang Sapian natuhoy sa isa ka Returning Overseas Filipino ukon ROF nga lunsay nagpositibo sa COVID-19 kag nakarekober sa isa lamang ka datos nga narekord sang Capiz Provincial Health Office ukon PHO sa isa lamang ka-adlaw.
Ginpahayag ni Dr. Alfonso Orosco nga natapos na ang 14-day quarantine sang 35-anyos nga ROF nga residente sang Barangay Lonoy sang nasambit nga banwa antes nag-guwa ang resulta sang iya Real-Time Polymerase Chain Reaction (RT-PCR) test.
Suno kay Orosco nga sadtong Agosto 15 ginpaidalom sa facility quarantine ang nasambit nga ROF kag ginkuhaan sang swab test.
Nahibaluan nga sadtong Agosto 28 natapos na ang iya 14 day quarantine kag ginpaguwa sa iya quarantine facility.
Apang sang Agosto 30, na naguwa ang RT-PCR test sini apang nakaguwa na ini sa quarantine facility.
Mahibaluan nga madamo sang natingala nga mga Sapianon sa ginpaguwa nga datos sang PHO kun sa diin narekord ang pagpositibo kag pagkarekober sang isa ka resindete sa isa lamang ka-adlaw.
Sa karon, nakapagkit na sang pinakauna nga kaso sang COVID-19 ang banwa sang Sapian.
