ROXAS CITY – Ginransak sang wala pa nakilala nga mga suspek ang municipal hall sang banwa sang President Roxas, sa probinsiya sang Capiz.
Suno kay Mayor Receliste Escolin, natukiban sang isa ka empleyado nga ginwasak sang mga suspek ang pirtahan sa nalikod nga bahin sang municipal hall para makasulod.
Naglapta ang mga papeles sa pila ka mga talatapan sa sulod sang munisipyo sang makita sang empleyado.
Kalakip sa mga ginsulod kag ginransak nga talatapan amo ang Human Resource Office, civil registrar’s office, treasurer’s office kag office of the executive assistant.
Maswerte naman nga wala nasulod sang mga suspek ang talatapan sang alkalde.
Nagapati ang alkalde nga may ginapangita nga dokumento ang mga suspek ba-se sa nakita nga paglapta sang mga gamit sa mga opisina sa munisipyo.
Padayun sa karon ang imbestigasyon sang pulisya sa insedente.
