ROXAS CITY – Nagpaathag ang isa ka artist angut sa mural painting sa nalikod nga porsyon sang pader sang Capiz Villareal Stadium sa Barangay Tiza, Roxas City nga ginareklamo sang sports and business affairs consultant sang gobyerno-probinsiyal nga si Mrs. Carmen Andrade.
Suno kay Lloyd Develos, 33 anyos sang Barangay Tiza, isa lamang siya sa tatlo ka mga pintor nga ginsugo nga magpinta sa amo nga pader.
Apang panindugan ni Develos nga ang amo nga mural painting ang may pahanugot sa gobyerno-probinsiyal sandig man sa ginhambal sang nag-kontrata sa ila nga tiyo sang Sangguniang Kabataan (SK) chairperson sang Barangay Tiza.
Suno kay Develos nga ang amo nga mural painting ang proyekto sang SK Association sang nasambit nga barangay sa pagpamuno ni SK Chairperson Andrei Obera kag isa siya sa napilian nga mangin pintor sini.
Ginpahayag ni Develos nga wala sila nagmatu-matu sang pinta sa nasambit nga pader kag indi man sini mahimo nga magpinta lamang nga wala sa isa ka lugar nga wala sang maayo nga katuyuan.
Aminado si Develos nga bilang isa ka artist naglain ang iya buot matapos ginreklamo ang amo nga mural painting.
Masakit para sa isa ka artist suno kay Develos nga tawgon lamang nga ‘vandalism’ ang para sa ila work of art.
Para kay Develos, indi man ini makabig nga vandalism bangud ang vandalism suno sa iya amo ang kapareho sang mga tinaga nga ginabutang sa mga pader gamit ang spray paint nga kahimuan sang rebelde nga New Peoples Army (NPA).
Madamo pa kuntani sang mga sports personalities ang natalana nga ibutang sa amo nga mural painting apang temporaryo nila ini nga gin-untat kasunod sang reklamo ni Andrade.
