ILO-ILO – Madinalag-on nga nagtapos ang Bombo Music Festival 2020: A Song-writing Competition of Wholly Original Melody and Lyrics nga ginpatigayon sa West Visayas State University Cultural Center, Iloilo City kagab-i.
Ginkilala bilang grand champion amo sanday Jhannel Alvarado kag Dave Alvarado sang Zamboanga City nga nagsulat kag nagkanta sang ambahanon nga may tigulo nga “Vows”.
Gindala naman nila pauli ang premyo nga P275,000 nga grand prize kag trophy.
Samtang, gindala naman pauli nanday Patrick Mark Armada kag Elmar Jan Bolaño nga nag-amba sang ambahanon nga “I’ll be right by your side” ang P200,000 kag trophy bilang 1st runner up.
Ginpasidunggan naman nga second runner up si Jose LG Fuentes sa ambahanon nga may tig-ulo nga “LDR”.
Nadag-an ni Fuentes ang P150,000 nga cash kag trophy.
Magluwas diri, nagbaton man sang pasidungog si Fuentes bilang ‘Best Interpreter” kag cash prize nga P30,000 matapos gin-amba ang “LDR”.
Samtang, ang mga ambahanon sang 12 ka mga Finalists ang ginapabati naman sa tanan nga Bombo Radyo kag Star FM Stations kag available man agud pamatian ukon ma-download sa tanan nga digital platforms kapareho sang Spotify, I-Tunes, Youtube Music kag Google Music.
Ang heavyweight jury subong nga tuig ang ginalakipan nanday Mr. Ryan Cayabyab, isa ka pre-eminent musician kag National Artist and Magsaysay Awardee in Music; Vehnee Saturno, certified gold record producer kag renowned composer; mga young hit makers kag artists kapareho nanday Bituin Escalante kag Myrus Ramirez kag ang Jesuit composer nga si Father Peter Pojol.
