Magatipon ang mga kauturan nga Muslim sa Barangay Baybay, Roxas City subong nga adlaw.
Ini kasunod sang ila kahandaan para sa selebrasyon sang Eid’l Fitr ukon ang pagtakop sang isa ka bulan nga pagpuasa.
Matandaan nga ginsaylo ang pag-obserbar sang Eid’l Fitr buwas nga adlaw matapos wala makit-an ang bulan kahapon sang gab-i, kasunod sang ginpatigayon nga moon sighting sang Bangsamoro Darul-Ifta.
Sa interview sang Bombo Radyo kay Mr. Abdul Rahman Ali, pinuno sang Muslim Community sa Capiz, iya ginpahayag nga ang Eid’l Fitr amo ang pista sang pagpalangga sa isigkatawo nga Muslim.
Suno kay Ali, kabahin sang ila selebrasyon ang paghanda sang mga pagkaon para sa mga muslim, lakip man ang pagpadulong sa iban nga lugar agud maglagaw.
Dugang pa ni Ali, nga ang leksyon nga iya nakuha sa Ramadan amo ang pagpalangga sa pamilya, ginikanan, abyan ukon sa bisan sin-o man, kag ang pagpaambit sang grasya sa mga ginagutom.
