Roxas City – Anay na nga polluted ang naaminhan nga bahin sang Thailand, apang mas ginakahangaw-an na sa karun sang mga pumuluyo ilabi na ang mga turista nga yara sa lugar.
Sa pagpakig-angut sang Bombo Radyo kay Dr. Jonald De Guzman Bombo International Correspondent sa Chiangmai Thailand, ginpahayag sini nga sumugod nag-abot siya sadtong 2013 polluted na ang nasambit nga lugar apang indi pa makabig nga delikado ikumparar subong.
Suno kay Dr. De Guzman, yara na sa 50 ka mga distrito ang nakapagkit sang unsafe level nga PM2.5 particles sa diin kinahanglan na nila nga masuksok sang N95 anti-pollution mask sa tion nga magguha sa ila puluy-an.
Ang nasambit nga polusyon ang nagasugod sa bulan sang Enero kag magatapos naman sa bulan sang Mayo.
Dugang pa ni De Guzman nga indi lamang ini maka-apekto sa ika-ayong lawas sang mga pumuluyo kundi subong man sa pagnubo sang ila ekonomiya ilabi na sa turismo.
Mahibaluan nga ang nasambit nga pungsod isa sa sikat nga tourist destination kag ginakabig yara sa ranked no.3 nga pinakamahigko nga lugar sa kalibutan suno sa IQAir firm.
Angut sini dako man ang ila palamangkutanon sa gobyerno bangud matapos ang na-eksperyensyahan wala sa gihapon ini ginapa-idalum sa state of emergency ang lugar ilabi na ang tuman nga apektado sang Air Pollution.
Isa sa ginalantaw nga rason nga gintunaan sang polusyon amu ang masami nga pagsunog sang mga kabukiran kag madamo nga mga pabrika nga ginapatukod sa nagkalain-lain nga sakop sang lugar.
Matandaan naglab-ot na sa masobra 200,000 nga mga indibidwal ang ginpadangat sa ospital agud hatagan sang nagaka-igo nga pagbulong.
