ROXAS CITY – Ginapatihan nga miyembro sang organisado nga grupo ang duha ka mga kalalakinhan nga nadakpan sa entrapment operation sang Criminal Investigation and Detection Group (CIDG) Capiz sa Sitio Jimenez, Barangay San Miguel Ilaya, Tapaz, Capiz.
Ginpahayag ni Police Staff Sergeant Edne Matillano sang CIDG-Capiz nga natigayon ang operasyon kasunod sang nangin transaksyon sa duha ka miyembro sang gun-running group nga sanday Leopoldo Latumbo sang Calinog, Iloilo kag Richard Palma sang Bingawan, Iloilo sa banwa sang Tapaz.
Nagtuyo pa nga magpalagyo si Palma nga nagserbe nga driver sang motorsiklo matapos nagpakilala ang ila ka-transaksyon nga mga pulis, apang natigayon man ini nga madakpan.
Ba-se sa nakasugtan sa transaksyon nga magabakal sang duha ka .45 caliber pistol ang ila buyer, apang isa ka .45 caliber pistol kag .22 caliber nga nagabalor sang P15,000 kada isa ang nadala sang mga suspek.
Ginpahayag ni Matillano nga posible madamo na nga mga Capizeño ang nabaligyaan sang duha sa diin ba-se sa ila monitoring nga madugay na ang mga suspek sa amo nga iligal nga buluhaton.
Kalakip sa mga narekober sa duha ang (1) .45 caliber, (1) .22 caliber nga pistol, mga bala , kutsilyo kag listahan sang ila mga ka-transaksyon.
