ROXAS CITY – Personal nga nagpangayo sang bulig sa gobernador sang probinsiya sang Capiz ang masobra 200 ka mga biktima sang illegal recruiter.
Ginpalab-ot sang mga biktima kay Governor Esteban Evan Contreras II, nga promesa nga wala natuman ang natabo sa ila nga handum nga makatrabaho sa iban nga pungsod para mabuligan ang ila mga pamilya.
Ini matapos nga gintunto sila sang ginatudlo illegal recruiter nga si Ramilyn Andrade sang Barangay Bolo, Roxas City.
Suno sa isa ka biktima nagbayad sila sang P73,700 kay Andrade para sa placement fee, pocket money, visa kag terminal fee kabaylo sang promesa nga trabaho sa pabrika sa Busan, South Korea nga ginapanag-iyahan sang tiyo sang koreano nga live-in partner ni Andrade.
Naka-schedule kuntani ang flight sang 1st batch sang Oktubre 20 apang wala nadayon kag gin-reschedule sang Nobyembre 10.
Pag-abot sang nasambit nga adlaw, wala na nagpakita sa mga biktima si Andrade kag ang koreano nga partner sini.
Samtang sa interview sang Bombo Radyo kay Punong Barangay Siolly Andrade gin-ako sini nga hinablos niya sa pakaisa ang ginatudlo nga illegal recruiter.
Apang lipod sa iya nga ihibalo nga nagapangrecruit ini sang iban nga tawo para magtrabaho sa South Korea.
Suno kay Kapitan Andrade, ang iya nahibaluan nga ang ila lamang pamilya ang buligan ni Ramilyn nga makatrabaho sa South Korea.
Nakibot na lamang ang opisyal sang nagpadulong sa barangay hall ang mga nagareklamo nga nabiktima sila ni Ramilyn.
