Ginalantaw nga problema sang caretaker sang Loctugan Cemetery ang mga ginabilin nga basura sang pila ka mga nagapadulong kag nagapanglimpyo sa nasambit nga sementeryo.
Sa interview sang Bombo Radyo kay Roberto Robles, caretaker sa amu nga sementeryo, may pila na ka mga tawo nga nagapanghawan sa nitsu sang ila mga himata apang indi malikawan nga may pila nga ginabilin lamang ang basura kag wala ginahaboy sa guwa sang sementeryo.
May ara man iban suno kay Robles nga ginahaboy lamang sa tabuk sang nitsu.
Panugyan sini sa mga nagapanghawan nga kun tani ihaboy gilayon sa guwa sang sementeryo ang mga hilamon ukon basura agud indi man makabig nga huol sa iban nga nagapanglimpyo.
Mahibaluan nga naga-amat-amat na damo ang nagapadulong sa mga sementeryo bangud sa nagahilapit nga Pista Minatay ukon tigkalalag.
