ROXAS CITY – Nagpakigsapol ang Roxas City Disaster Risk Reduction and Management Council (RCDRRMC) kay Roxas City Mayor Ronnie Dadivas agud hinalaan ang dugang nga mga lihok sang gobyerno sang siyudad sa kampanya kontra coronavirus disease (COVID-19) pandemic.
Sa interview sang Bombo Radyo, ginpahayag ni Mayor Dadivas nga sa nasambit nga sinapol nakasugtan ang pag-program sang nabilin nga Disaster Fund sang siyudad nga nabilin sang tuig 2018 kag 2019 sa Disaster Fund sini nga tuig 2020 ilabi na sa Quick Response Fund.
Suno sa alkalde nga sang tuig 2019, may nabilin pa nga kapin P11.2 milyones sa disaster fund sang siyudad kag kapin P19.1 milyones naman ang nabilin sang tuig 2018.
Igadugang ini sa Quick Response Fund para sa tuig 2020 nga may yara na lamang sang kapin P9 milyones matapos naibanan na sang naglaslas ang bagyong Ursula sa siyudad.
Kun pagatingbon suno kay Dadivas, magadangat sa kapin P30.3 milyones ang Quick Response Fund sang siyudad kag madamo ini sang pagakadtuan ilabi na sa krisis sa karon tuga sang COVID-19.
Suno kay Dadivas nga pagapainan sang pondo ang pagbakal sang bulong, mga personal protective equipments (PPE’s), medical supplies, services kag iban pa nga related expenses.
Pagapondohan man ang evacuation center sang siyudad nga naba-se sa Barangay Milibili para sa installation sang power supply, water services, communication equipments and furnitures, comfort rooms kag iban pa nga medical compartments.
Magapain man sang pondo ang siyudad para sa food assistance nga igahatag sa mas o menus 28, 000 ka mga pamalay sa siyudad.
Magahatag man sang assistance para sa mga pasyente sang coronavirus disease (COVID-19) ilabi na ang Persons Under Investigation kag burial assistance naman pananglitan may marekord nga death toll sa siyudad bangud sang amo nga balatian.
Magluwas diri, pagahatagan man sang ayuda ang mga frontliners nga nagasakripisyo kag nagahatag sang serbisyo agud matapna kag mapunggan ang pagpapta sang coronavirus.
