Gin-report sang Department of Health (DOH) ang na-monitor nga pila ka indibidwal nga nabudlayan sa pagginhawa kag gin-atake sang anxiety ukon tuman nga pagkakulba kasunod sang una nga paglupok sang bulkan Kanlaon.
Suno kay DOH Undersecretary Gloria Balboa, hugot ini nga ginabantayan subong sang ahensiya, sa pagpanguna sang Center for Health and Development Negros Island Region (CHD NIR) agud masiguro nga mabantayan ang kahimtangan sang mga residente.
Nagpadala naman ang DOH sang dugang nga supply sang N95 masks, wash and nutrition commodities, kag dugang nga mga bulong sa local office sini.
Ang mga ini ang magamit sang mga naka-deploy nga DOH personnel, evacuees, kag mga residente sa lugar.
Nag-deploy man ang ahensiya sang Human Resources for Health (HRH) teams sa mga evacuation center para sa dugang nga health services magluwas pa sa serbisyo nga nagahalin mismo sa mga LGUs.
Sa karon, padayon ang referral nga ginahimo sang mga nasambit nga team sa mga indibidwal nga nakitaan sang mga sakit padulong sa mga nagapanguna nga hospital para sa dugang nga medical attention.
Suno pa sa ahensiya, magapadayon man ang surveillance nga ginahimo sini sa mga health-related symptoms agud mangin madasig ang pag-aksyon sa ila mga kinahanglanon nga medikal.
