ROXAS CITY – Suportado sang gobyerno ang kinahanglanon sang mga residente sa Canada samtang naka lockdown pa ang pungsod bangud sa epekto sang coronavirus disease 2019 (COVID-19).
Sa report ni Bombo International Correspondent Lazaro Buboy Basinang, tumandok sang President Roxas, Capiz kag 20 na ka tuig nga nagatrabaho sa Canada bilang Maintenance Manager sang Amazon Jones Lange Lasalie, ginpahayag sini nga nagahatag sang income support ang gobyerno sa mga nadulaan sang trabaho bangud sa COVID-19
Kinahanglan lamang nila nga mag-apply sa Canada Emergency Response Benefit (CERB) kag makabaton sila sang 2,000 Canadian dollars kada bulan.
Libre man ang hospitalization sa Canada kalakip ang dental kag laboratory test.
Hugot man ang ginapatuman nga physical distancing kag mandatory ang paggamit sang face mask labi na kun magguwa sa balay.
Temporaryo man nga ginsuspende ang social gathering ukon pagtipon tipon, kalakip ang pag-camping nga kinaandan na nga ginahimo sang mga taga Canada labi na kag springtime sa karon sa pungsod.
Nahibaluan pa nga sarado man ang mga coffee shops kag banko kag lunsay delivery ukon take out orders lamang kun magbakal sang pagkaon.
