ROXAS CITY – Tion na agud maghulag ang tanan agud mabululigan nga mapahagan-hagan kag sa ulihi masolusyonan ang mga problema sa aton palibot, kaangay sa naeksperyensiyahan nga tuman nga pagbaha sa probinsya.
Sa interview sang Bombo Radyo kay Atty. Emilyn ‘Abeb’ Arboleda-Depon, former Acting CaPENRO head kag sa karon nagapadayon sa iya adbokasiya bilang FB page owner sang ‘Atty. Abeb – The Tree hugger’, ginpakigbahin sini ang iya mga eksperyensiya kag suhestiyon nga makabulig sa pagluwas batuk sa dalayon nga pagkaguba sang aton palibot.
Ginpakigbahin sini ang nakikita niya nga factor sa naeksperyensiyahan nga tuman nga pagbaha, kag pila diri amu ang poor planning sa imprastraktura, pagkakalbo sang kabukiran kag ang iligal nga pagpatindog sang mga istraktura sa mga gwaan sang tubig, nga kuntani gina-regulate sang aton gobyerno.
Nasubuan lang ini kun iya madumduman nga sang 1900’s ang bug-os nga Pilipinas ang may yara sang kapin 20 million hectares sang virgin forest, apang sa karon nga tinuig, wla-tuo na ang landslide kag flash flood sa Pungsod.
Diri sa Capiz, sa iya paglibot, makahalangusbo nga makit-an ang sitwasyon sang kalbo na nga kabukiran.
Maayo suno diri ang ginaproponer nga proyekto angut sa Panay River basin, nga kuntani pagasuportahan sang karon nga administrasyon.
Bangud sini, Nagahinyo ini sa lokal nga gobyerno nga mangin data-driven kag scientific ang pag approach sa pag-aksyon sa mga problema sang aton palibot, kag himuon sang kada isa sa aton ang ila parte agud mapahagan-hagan ang epekto sang climate change sa aton pungsod ilabi na sa aton probinsya.
Ini pinaagi sa patanom sang madamo nga kahoy kag sa simple nga pagsegregar sang basura.
Magserbe man kuntani nga pamukaw-pukaw ang nagakahinabo nga pagbaha, agud amligan ang aton dunang manggad.
