ROXAS CITY – Nagapabilin sa Roxas Memorial Provincial Hospital (RMPH) ang seabased repatriated OFW nga nag-abot sa syudad sang Roxas sang damlag lang kag nagpositibo sa rapid test.
Ginpahayag ni Mr. Dennis Saneo, City Disaster Risk Reduction and Management Officer nga samtang ginahulat pa ang resulta sang ginpatigayon nga Real Time Polymerase Chain Reaction (RT-PCR) test, ginpahamtang karon sa RMPH ang nasambit nga repatriated OFW bilang kabahin sang protocol.
Nangin limitado man ang ginhatag nga impormasyon ni Saneo sa nasambit nga OFW bangud suno sa iya nga indi sila ang nagakaigo nga ahensiya para magpalayag sang dugang nga impormasyon kag nagasunod lamang sa pagsulundan.
Nahibaluan nga Abril 19, 2020 sang nag-abot sa Pilipinas ang nasambit nga OFW kag ginpaidalum man sa quarantine sa Metro Manila antes nalakip sa mga repatriated nga nakapauli sa probinsiya.
Ginkumpirma man ni Saneo nga wala sang anuman nga sintomas nga ginpakita ang amo nga OFW kag nakibot sang nagpositibo sa makaduha ka beses nga ginpatigayon nga rapid tests.
Sa karon ginahulat na lamang ang resulta sang RT PCR test sa specimen sang amo nga repatriated OFW.
