Lubos nga ginsirado ni Naga City Mayor Leni Robredo ang posibilidad nga magpadalagan liwat sa national positions sa 2028 elections, lakip na ang pagkapresidente kag pagkasenador, sa pihak sang padayon nga panawagan sang pila ka mga anay kaalyado kag mga suporta.
Ginpanindugan ni Robredo nga madugay na siya nga nagdesisyon nga indi na magbalik sa national government kag wala sang may makabag-o sa iya desisyon.
Gin-athag sang alkalde nga wala man niya ginakabig nga preparasyon sa mas mataas nga posisyon ang iya posisyon subong sa lokal nga gobyerno.
Ginhatagan man niya sang importansya nga bisan indi na siya magtinguha sang ikaduha nga termino bilang alkalde sang Naga City, wala ini nagakahulugan nga magabalik siya sa national politics.
Gin-ako man ni Robredo nga base sa iya kaugalingon nga assessment, may limitasyon siya sa pag-atubang sa mga komplikado sang national politics.
Apisar nga nagapati siya nga masarangan niya nga himuon ang katungdanan sa national government, ginpahayag sini nga nagakinahanglan ini sang bastante nga political savvy agud magdumala indi lang sang trabaho kundi pati man sang mas malapad nga political affairs sa pungsod.
Sa baylo nga magpadalagan liwat, ginpahayag ni Robredo nga hayag niya nga ginsuportahan ang iban pa nga mga indibidwal nga sa iya panan-awan may ikasarang kag nagakabagay nga magpamuno sa pungsod.
Matandaan nga si Robredo ang nagserbe bilang bise presidente halin 2016 tubtob 2022 kag nagpadalagan sa pagka-presidente sa 2022 elections, kon sa diin napierde ini kay President Ferdinand Marcos Jr.
Sang 2025, nagbalik ini sa lokal nga pulitika kag napilian bilang alkalde sang Naga City.
Apisar nga may kaangtanan ang iya pangalan sa posible nga mga kandidato sa 2028 presidential race, gin-athag ni Robredo nga luyag sini nga i-focus ang iya oras kag efforts sa pagserbisyo sa mga pumuluyo sang Naga City sa baylo nga magsulod liwat sa national politics.
