ROXAS CITY – Ginklaro sang mga barangay officials sang Barangay Poblacion Ilaya, Panay, Capiz nga wala sang kamatuoran nga may duha ka mga Persons Under Investigation (PUI’s) sa housing units sa amo nga lugar nga napatay.
Ini gin-athag ni Barangay Kagawad Paul Ivan Relano sang mainterview sang Bombo Radyo.
Gintadlong ni Relano nga wala sang may napatay nga persona sa ila barangay nga nakaclose-contact sa napatay nga coronavirus disease (COVID-19) patient nga taga-Barangay Dayao.
Apang ginkumpirmar sini nga may mga persona nga naga-estar sa nasambit nga barangay nga nagatrabaho sa isa ka resort nga malapit sa balay sang napatay nga COVID-19 patient.
Apang suno sa opisyal nga yara sila sa maayo nga kondisyon bangud wala sila nakaclose-contact sa napatay nga COVID-19 patient bangud madugay na sila nga naghalin sa ila nga trabaho.
Apang sa pihak sini, strikto sa gihapon ang pagpatuman sang checkpoint agud mapasiguro ang seguridad kag ikaayong-lawas sang mga pumuluyo sang nasambit nga barangay.
