ROXAS CITY – Ginsuguran na sang Capiz Electric Cooperative (CAPELCO), Telecommunications kag Cable companies ang pagkay-o sa nagalaylay nga mga kable ukon spaghetti wires nga indi maanyag kag masakit sa panulukan.
Ini ang ginpahayag ni Board Member Aldwin Cruz-Am, Chairman sang Committee on Communication, Transportation and Public utilities sang mainterview sang Bombo Radyo.
Suno kay Cruz-Am, nalipay ini nga naga-kooperar tanan para sa pagpaanyag sang syudad kag bug-os nga probinsya sang Capiz ilabi na nga nagahilapit na ang Capiztahan 2023.
Nahinalaan sa pagsinapol nga ginhiwat sa kapitolyo, nga kinahanglan matapos sang natungdan ang mga spaghetti wires diri sa syudad tubtob sa Marso 31, para sa seguridad kag mapalayo ang mga pumuluyo sa aksidente.
Pahanumdom pa ni Cruz-Am nga may napapasar na sila nga ordinansa natuhoy diri kun sa diin ang madakpan nga magalapas diri ang may penalidad nga P5,000 kag pagahatagan sang 15 diyas nga plaso agud kay-ohon ang mga kable. Pananglitan indi maka-comply ang natungdan, ang gobyerno probinsyal ang magakay-o diri kag pagabayaran sang kumpanya.
Ginasiguro naman sini, nga sa tion nga mapirmahan na ang ordinansa pagatutukan ini sang provincial engineer.
Nagalaum si BM Cruz-Am, nga pinaagi sini, magadamo pa gid nga turista kag investors ang magapadulong sa probinsya.
