ROXAS CITY – Mabaskog ang pagpati sang nagapadalagan nga punong barangay sang Barangay Bato Bato, Mambusao, Capiz nga may kahilabtanan sa pulitika ang pagpaarak sang luthang kag paghaboy sang granada sa iya nga balay.
Sa eksklusibo nga interview sang Bombo Radyo Roxas kay incumbent barangay kagawad Arnel Labao alyas Botsoy, ginpahayag sini nga wala sang iban nga rason nga nagsulod sa iya pinsar matapos ang insedente kundi ang pagpadalagan sini bilang punong barangay.
Sa pihak nga wala ini sang nabaton nga death threat ang opisyal, apang nagapati ini nga luyag siya nga pahugon kag may intensyon nga patyon kun makakita sang tsansa.
Kasumpong sini sa nasambit nga posisyon ang iya nga pakaduha nga may apelyido nga a Labao.
Apang suno diri nga wala sila sang lainay sang buot matapos nga ginpatawag sila nga duha ni Mayor Leodegario Jun Labao, sang Mambusao kag pareho nga gin-estorya.
Nahibaluan nga antes ang pagstraffing sa balay sang opisyal may nauna na nga insedente sa diin ginpalukpan ang balay sang iloy ni Kagawad Labao sadtong Mayo 6 sang gabi kag Mayo 7 sang kaaganhon naman sa balay sini.
Samtang sa pihak sang pamahog sang kun sin-o man sa opisyal nagpanindugan ini nga indi mag-atras sa iya nga kandidatura kag padayunon ang paghatag sang serbisyo sa iya mga constituents.
