ROXAS CITY – Nagtingub sang pwersa ang nagkalain-lain nga ahensya sang gobyerno kadungan sa pagdumdum sang Undas 2024 subong nga Nobyembre 1.
Sa interview sang Bombo Radyo sa tagpamaba sang Roxas City PNP nga si PCPMS. Ramil Arcangeles ginpahayag sini nga naka-designate sa nagkalain-lain nga mga sementeryo ang mga otoridad agud mapabilin ang peace and order sa tagsa ka mga patyo.
Suno kay Arcangeles, naga-amat-amat pa lamang nga nagadamo ang tawo nga nagapadulong ilabi na sa Cagay Cemetery agud magbisita sa ila mga himata nga nagtaliwan na.
Mahibaluan nga agud mapabilin ang seguridad sa lugar yara ang presensya sang Bureau of Fire Protection (BFP), Capiz Disaster Risk Reduction Management Office (CDRRMO), Traffic Management Unit (TMU), Barangay Peacekeeping Action Teams (BPAT) sang Barangay Cagay, Philippine National Police (PNP) kag iban pa.
Mensahe sini sa mga magapadulong sa lugar, likawan nga magdala sang mga bagay nga ginadumilian kaangay sang mga matalum nga butang, perfume, dalagko nga mga sounds kag madamo pa.
