ROXAS CITY – Nagapanawagan ang nagkalain-lain nga NGO sa Capiz sa gobyerno probinsyal nga solusyunan na ang lapnagon nga pagbaha pinaagi sa pagpahamtang sang floodwater exit.
Sa interview sang Bombo Radyo kay Ret. Col. Joseph Bernales, miyembro sang Veterans Federation of the Philippines, ginsiling sini nga ang pagpahamtang sang floodwater padulong sa dagat ang makapauntat sa pagbaha sa mga kabarangayan sa probinsya.
Suno diri, kinahanglan nga pamatian sang gobyerno ang ila petisyon bangud ba-se sa ginhiwat nila nga ocular visitation sa mga lugar nga masami naapektuhan sang pagbaha, nagataas kada tuig ang numero sang casualties ukon nagkalamatay, daku nga kahalitan sa sektor sang agrikultura, pagkaguba sang imprastraktura kag river controls.
Nagapati si Bernales nga kun indi gilayon nga ma solusyunan ang pagbaha maapektuhan sini ang ekonomiya sang probinsya kag tunaan sang kapigaduhon.
Pahayag sini, panay river gid lamang ang ginaagyan sang tubig-baha sa bug-os nga probinsya rason nga mahinay ang paghubas sang tubig kun tag-ululan.
Bangud sini, nakadihon sang solusyon ang grupo kag ginasuhestyon sini nga padalumon kag palaparon ang Panay River ukon magconstruct sang exit waterways ukon by-pass tunnel agud magdiretso ang tubig sa dagat.
Aminado man ini nga daku nga kantidad nga kuwarta ang pagagamiton sa amu nga proyekto apang nagapati ini nga sa karon nga liderato mangin posible ang nasambit nga proyekto.
