ROXAS CITY – Gindula karon sang tagpamaba sang Roxas City PNP ang pagkabalaka sang publiko angut sa nagalapta nga report nga pagpangkidnap sang mga kabataan kag kababainhan sang isa ka puti nga van sa syudad sang Roxas kag probinsiya sang Capiz.
Ginpahayag ni Police Master Sergeant Ramil Arcangeles nga sumugod nga naglapta ang balita sang Sabado tobtob subong nga adlaw, wala sang may nakapagkit sa police blotter report nga missing ukon ginkidnap nga mga indibidwal.
Suno kay Arcangeles sa pagpangusisa sang kapulisan natukiban nga sang nagligad nga tuig nagtuhaw man ang kasubong sini nga report apang gin-ilisan lamang ang kolor sang van sang puti kalakip ang plate number.
Makit-an man sa social media site nga Facebook ang pangalan kag laragway sang persona nga ginaalegar kalakip sa nagapangkidnap sang mga kabataan kag kababainhan.
Bangud sa nagalapta nga sala nga impormasyon makaluluoy ang persona kag ang tag-iya sang van nga puti nga ginapasibangdan nga responsable sa pagpangkuha sang mga bata.
Apang mahimo ang mga natungdan makapasaka sang panumbungon nga online libel in relation sa cyber crime law.
Samtang nagpangabay si Arcangeles sa publiko nga indi pag-i-share ukon indi pag-ipalapta ang sala nga impormasyon agud indi makatuga sang kakugmat sa mga pumuluyo.
Ginpanugyanan man sini ang sin-o nga makabaton sang kasubong sini nga impormasyon nga sa baylo i-share sa ila mga himata mas maayo nga magpakig-angut sa istasyon sang pulisya agud ila ini maaksyunan.
Ginpanindugan pa ni Arcangeles nga fake news kag pagpatalang lamang ang nagalapta karon nga balita sa FB sa diin tuyo lamang sini nga magtuga sang kakugmat sa mga Capizeño.
