ROXAS CITY – Nagpadulong ang isa ka lalaki sa Roxas City PNP bangud sa wala na nagbalik ang nagpakilala nga mekaniko nga nag-apply sa iya shop kag nagbulontaryo nga magbakal sang pyesa apang matapos nga makuha ang kwarta wala na ini magpakita.
Ginkilala ang biktima kay alyas Jose, 32-anyos nga residente sang Brgy. Banica, Roxas City samtang ang ginatudlo nga suspek ginkilala kay alyas “Gerald” nga residente naman sang Sinsuat Avenue, Cotabato City.
Base sa nakuha nga impormasyon nagikan sa Roxas City Police Station, ginapahayag nga sang tinalikdan nga adlaw, nagpadulong ang suspek nga si alyas Gerald sa auto shop sang biktima sa Brgy. Banica kag gin-offer sini ang iya ginamaneho nga motorsiklo nga i-swap sa salakyan sang biktima apang wala ini nadayon.
Suno sa biktima, nag-apply nalang ang suspek bilang mekaniko sa nasambit nga shop kag nagboluntaryo nga sya nalang ang mabakal sang mga pyesa bangud makuha niya sa manubo nga presyo sa Masbate.
Nagpasugot naman ang biktima kag naghatag ini sang P18,000 apang matapos nga makuha ang kwarta wala na makabalik ang amu nga suspek.
Nahibaluan nalang sang biktima nga may yara na sang anay nga kaso ang suspek nga RA 10883 ukon New anti-carnapping law sa iban nga lugar matapos ginpost sang biktima ang motorsiklo sang suspek kag didto may nag-comment nga kinawatan ang amu nga motorsiklo.
Sa karon, padayon ang pag-ayam sang mga kapulisan sa nasambit nga suspetsado.
