ROXAS CITY – Padayon nga gina-imbestigahan sang kapulisan ang nabaton nga death threat sang principal sang Panit-an National Highschool sa nagpakilala nga vigilante group.
Ginkabalak-an ni Mr. Ronilu Tu, ang nabaton nga sulat nga nagaunod sang pamahog sa iya nga hiwa-on ang iya nga tiyan kag bitayon kun padayon nga obligahon ang mga ginikanan sang mga senior high school students nga magbayad sang P350.00 para sa proyekto nga foot walk sang nasambit nga eskwelahan.
Apang amat amat nga nahatagan sang sabat kun sin-o ang yara sa likod sang sulat matapos nga ginpasulat sa logbook ang nagdala sini nga si Mr. Jeffrey Dorde.
Mismo ang principal nga si Tu ang nakapansin nga nagaanggid ang stroke sang handwriting ni Dorde sa handwritingsang nagpadala sang death threat.
Bangud diri, ginpaidalum sa intergasyon sang mga pulis si Dorde apang nagpanindugan ini nga ginhatag lamang sa kanya ang sulat sang riding in tandem kag ginpalihog nga ihatag kay Tu.
Sa katapusan sang interogasyon nag-ako si Dorde nga may tawo nga nagsolsol sa iya para himoon ang nasambit nga tikang apang nagapati ang principal nga may iba pa nga ginikanan nga may kahilabtanan diri.
Napa-blotter na man sang principal ang nabaton nga death threat sa Panit-an Municipal Police Station kag naka-estorya na ang legal counsel sang Capiz DepEd division para sa legal action nga himoon sa mga tawo nga yara sa likod sini.
